Мақтаралға тасқын сумен өзбекстандық бір адам ағып келген

Өзбекстанның бір азаматы су тасқыны кезінде каналдағы сумен Мақтаралға ағып келген. Бұл туралы Түркістан облысының қоғамдық денсаулық басқармасының басшысы Марат Пашимов кезекті брифинг барысында мәлімдеді.

Басқарма басшысының айтуынша, өзбекстандық кеше түнде канал жағасынан табылған. Белгілі болғандай, ол өзінің атымен бірге суға ағып кеткен. Сол судың ағысымен ол Мақтарал ауданының Жеңісті ауылына жеткенде, тұрғындар оны байқап қалған. Сөйтіп оны жабылып жүріп судан шығарып алған.

«50 жастағы ер адам Мақтарал аудандық ауруханасына жатқызылды. Суға батқан адамға «жеңіл түрі» деген диагноз қойылған. Оған алғашқы медициналық көмек көрсетілген, жағдайы қанағаттандырарлық. Бүгін түсте ол жағдайы жақсарған соң, ауруханадан шығып кеткен. Ол Өзбекстанға кері қайтамын деп түсіндірді», — деді Марат Пашимов.

ҚазАқпарат