Күшіміз — бірлікте: Қазақстан халқы Ассамблеясы Кеңесінің кеңейтілген отырысы өтті

ҚХА-ның XXXIV сессиясы қарсаңында Астанадағы Бейбітшілік және келісім сарайында Қазақстан халқы Ассамблеясы Кеңесінің кеңейтілген отырысы өтті, деп хабарлайды jasqazaq.kz.

Мәдениет және ақпарат министрлігі баспасөз қызметінің мәліметінше, жиынға Қазақстан Президентінің Ішкі саясат және коммуникациялар мәселелері жөніндегі көмекшісі Арман Қырықбаев, Парламент депутаттары, мәдениет және ақпарат вице-министрі Евгений Кочетов, Қазақстан халқы Ассамблеясы Кеңесінің мүшелері, республикалық этномәдени бірлестіктердің басшылары мен мүшелері, ҚХА қоғамдық құрылымдарының өкілдері қатысты.
Ассамблея институтының елдегі бірлік пен келісімді нығайтудағы рөлі, сондай-ақ еліміздегі ауқымды өзгерістер барысындағы маңызы атап өтілді.
Ассамблеяның 30 жылдығы аясында атқарылып жатқан жұмыстар талқыланды.
Кеңес қатысушылары Қазақстан халқы Ассамблеясының 30 жыл ішіндегі этносаралық бірлік пен келісімді нығайтуға қосқан үлесін, «Әралуандықтағы бірлік», «Біз әртүрліміз – бірақ теңбіз» қағидаттарын қоғамда сақтау мен ілгерілетудің маңызын ерекше атап өтті.

Жиын барысында Қазақстан халқы Ассамблеясы қызметінің алдағы бағыттары талқыланды, атап айтқанда этномәдени бірлестіктер қызметін, ҚХА Ақсақалдар және Аналар кеңестерінің жұмысын, ҚХА қайырымдылық қызметін, этномедиация институтын, ғылыми-сарапшылық қызметін, «Ассамблея жастары» ұйымының жұмысын т.б. дамыту және жандандыру мәселелері сөз етілді.

JQ-Aqparat
Сурет: мәдениет және ақпарат министрлігінің баспасөз қызметі