«Күн санап көбейіп жатыр». Айгүл Орынбек қайырымдылық қорлары туралы мәселе көтерді

Елге танымал заңгер, Ұлттық құрылтай мүшесі Айгүл Орынбек қайырымдылық қорлары көбейіп кеткені туралы мәселе көтерді, jasqazaq.kz.
Айгүл Орынбек Ұлттық құрылтай отырысында сөйлеген сөзінде:
«Қазіргі таңда мемлекетімізде түрлі қайырымдылық қорлары көбейіп кетті. Қайда барсаң да — ақша жинап жүрген қорлар мен олардың ел танымайтын мүшелері мен басшыларын көресің. Өкінішке қарай, “қайырымдылық қорлардың” атын жамылғандардың барлығы адал жолмен жүріп, шынайы мақсаттарға қызмет етіп жатыр деп айта алмаймын. Мысалы, жай ғана Каспий қосымшасында 358 – қайырымдылық қоры халықтан электронды түрде жылу жинау үшін тіркелген екен.
Таңданатыны сол, бұл қорлардың кейбірі тіпті қандай мақсатта және не үшін құрылғаны белгісіз. Басшылары да көрсетілмеген. Кейбір қорлардың интернетте атқарған жұмысы жайлы есептерін таппадым. Ал дүкендер мен сауда сөрелеріндегі қайырымдылық үшін қойылған жәшіктердің санын білмейміз. Күн санап көбейіп жатыр, бірақ ол ақшаның да сұрауы жоқ, — деді.
Заңгер мұндай күдік тудыратын қорлар арандатушылар мен радикалды топтарды қаржыландыруы мүмкін деген ойын ашық айтты.
«Бұл — шұғыл шешуді қажет ететін ең басты мәселе. Сондықтан осы қор жұмыстарының жауапкершілігін күшейту мақсатында заңға тиісті өзгерістер енгізу туралы тапсырма беруіңізді сұраймын», — деді ол.
JQ-Aqparat

Сурет: ortcom.kz