Қызылордада тұрғын үй құрылысы қарқын алып келеді

Қызылорда облысында тұрғын үй құрылысы соңғы жылдары қарқынды дамып, өңір тұрғындарын баспанамен қамту бағытындағы жұмыстар жүйелі түрде жүргізіліп келеді. Мемлекеттік бағдарламалар мен бюджет есебінен жүзеге асырылып жатқан жобалар аймақтағы әлеуметтік инфрақұрылымды нығайтуға мүмкіндік беруде.

Қызылорда облысының құрылыс, сәулет және қала құрылысы басқармасы басшысының орынбасары Марат Мырзабеков өңірде тұрғын үй құрылысы «Тұрғын үй-коммуналдық инфрақұрылымды дамытудың 2023–2029 жылдарға арналған тұжырымдамасы» аясында іске асып жатқанын атап өтті. Оның сөзінше, 2025 жылы бюджет қаражаты есебінен барлығы 2477 пәтер пайдалануға берілген.

«Бұл үйлер өңірдегі баспана кезегінде тұрған азаматтардың әлеуметтік жағдайын жақсартуға бағытталған. Соңғы жылдары тұрғын үй құрылысына ерекше назар аударылып отыр. Биыл пайдалануға берілген пәтерлердің басым бөлігі Қызылорда қаласына тиесілі», – деді Марат Мырзабеков.

Берілген мәліметке сәйкес, облыс орталығында 1895 пәтер пайдалануға тапсырылды. Сонымен қатар аудан орталықтарында 332 пәтер салынса, Байқоңыр қаласында 250 пәтер тұрғындардың игілігіне берілген.

«Тұрғын үй құрылысы тек облыс орталығында ғана емес, аудандарда да кезең-кезеңімен жүзеге асырылып келеді. Бұл өз кезегінде ауыл-аймақтардың дамуына да оң әсер етеді. Жаңа үйлердің салынуы тұрғындардың өмір сүру сапасын арттыруға мүмкіндік береді», – деді басқарма басшысының орынбасары.

Өңірде тұрғын үй құрылысы алдағы жылы да жалғасын табады. Қазіргі таңда 2026 жылға арналған жоспарлар да бекітілген.

«2026 жылы бюджет есебінен 2400 пәтерді пайдалануға беру жоспарланып отыр. Оның ішінде 2360 пәтер Қызылорда қаласында, ал 40 пәтер Жаңақорған ауданында салынатын болады. Бұл жұмыстар өңірде тұрғын үйге деген сұранысты азайтуға бағытталған», – деді Марат Мырзабеков.

Жалпы, облыста жүзеге асырылып жатқан құрылыс жобалары халықты қолжетімді баспанамен қамтамасыз етуге және өңірдің әлеуметтік-экономикалық дамуын қолдауға ықпал етуде. Алдағы жылдары жаңа тұрғын үйлердің саны артып, баспана кезегінде тұрған азаматтарға қосымша мүмкіндіктер жасалмақ.

Олжас Әбдіхалық