Қыз алып қашқандар 7 жылға дейін бас бостандығынан айрылуы мүмкін

14 мамыр, 15:52

Мәжіліс депутаты Мұрат Әбенов қыз алып қашқандардың жазасын қатаңдатуға қатысты түсінік берді. Оның айтуынша, айыппұлдан басқа бас бостандығынан айыруға дейін қылмыстық жаза енгізу қарастырылып жатыр, деп хабарлайды jasqazaq.kz.

Мұрат Әбенов көп жағдайда қыз алып қашқандар жазаланбайтынына қынжылыс білдіріп, мынадай деректермен бөлісті: 3 жылдың ішінде полицияға некелесуге мәжбүрлеу бойынша 214 шағым түскен. Соның 10 шақтысы ғана сотқа дейін жеткен. 205 жәйт бойынша қылмыстық іс жабылған.

Депутат 18-ге толмаған қызды, сондай-ақ күштеп немесе топ болып алып қашқандарды 5-7 жылға дейін бас бостандығынан айыру қажет дейді.
Келесі аптада осы мәселе бойынша заңға енгізілетін ұсыныс-өзгерістер екінші оқылымда қаралады.

JQ-Aqparat
Фото sntat.ru