Қорғаста жүздеген көлік кептеліп қалды

Қазақ-қытай шекарасында кептеліс. Қорғаста төрт күннен бері 200-ден астам көлік Қытайға қарай өте алмай тұр. Кедендегі иін тірескен кезектің неден туғанын ашулы жүргізушілерге ешкім де түсіндірмеген. Ебін тапқандар, осылайша ақша беріп, қарсы бетпен өтіп кетеді екен. Бұл туралы КТК телеарнасы хабарлады.

Ал оған келіспегендер, болмаса тамыр-танысы жоқтар тәуліктеп тұруға мәжбүр. Жүргізушілер тамақтарын да көлік ішінде ішіп, сонда түнеп жүр. Ұзындығы 4 шақырымға жетіп жығылатын кептелістің қашан тарайтыны әзірге белгісіз. Кеденшілер де жұмған ауыздарын ашпай отыр.

Игорь, көлік жүргізушісі:

-100 доллар бергендер демде өтіп кетеді. Шекара қызметіндегілердің осында өз делдалдары бар. Әйтпесе, қарсы бетпен ешкімді жүргізбеуі керек қой. Өз басым кезегімді күткеніме төрт тәуліктен асты.