Қазақстан-Вьетнам: тамыры терең достық

Президент Қасым-Жомарт Тоқаев елорда әуежайында елімізге мемлекеттік сапармен келген Вьетнам Коммунистік партиясы Орталық комитетінің Бас хатшысы То Ламды қарсы алды, деп хабарлайды jasqazaq.kz.
Aqorda_resmi Телеграм каналындағы мәлімет бойынша, сапар аясында шағын және кеңейтілген құрамда келіссөздер өтеді. Сондай-ақ бірқатар маңызды құжатқа қол қою жоспарланған.
Оған дейін Қазақстан мен Вьетнам басшылары елорда әуежайында аз-кем әңгімелесті.

Қазақстан Президенті Қасым-Жомарт Тоқаев: «Құрметті То Лам мырза, еліміздің астанасына қош келдіңіз! Сіздің сапарыңыздың тарихи маңызы зор және Қазақстан мен Вьетнам арасындағы ықпалдастықты кең ауқымда дамытуға тың серпін береді деп санаймын. Сіздің еліңізге жасаған сапардан үлкен әсермен оралдым. Вьетнаммен түрлі бағыттағы байланысты жан-жақты нығайту тұрғысынан жұмысты жалғастыру қажет деген ойға келдім. Екі ел ынтымақтастығының әлеуеті мол», -деді.
Вьетнам Коммунистік партиясы ОК Бас хатшысы То Лам да өз ілтипатын білдірді:
«Қадірлі Президент мырза, Сізге және Қазақстан халқына шынайы ризашылығымды білдіруге рұқсат етіңіз. Ұшақ трапынан қарсы алғаныңыз – біз үшін зор мәртебе. Бұл асқан қонақжайлылықтың және бізге көрсетілген құрметтің белгісі. Қазақстан мен Вьетнамды тамыры терең достық қарым-қатынас байланыстырады».
JQ-Aqparat
Сурет: aqorda_resmi