Кендірлі әуежайы құрылысы екі ауысымда жүзеге асырылуда

Кендірлі әуежайының құрылыс барысын көлік министрі Марат Қарабаев тексерді, деп хабарлайды jasqazaq.kz.

Көлік министрлігінің мәліметінше, қазір құрылыс жұмыстары екі ауысымда атқарылып жатыр.
«Мердігер мекеме жер жұмыстары мен қазаншұңқыр қазу жұмыстарын атқаруда. Құрылысқа 60 бірлік арнайы техника мен 80 маман жұмылдырылды. Кендірлі үлкен туристік әлеуетке ие. Атырау, Ақтөбе, Орал, Алматы, Астанаға бес ішкі авиарейсті, сондай-ақ көрші мемлекеттерге бірқатар халықаралық авиарейстерді ашу мәселесін пысықтап жатырмыз»,- деп атап өтті Марат Қарабаев.

Естеріңізге сала кетейік, жоба аясында 2200 метрлік ұшу-қону жолағын салу көзделген. Әуежайдың өткізу қабілеті сағатына 150 жолаушыны құрайды.
Сондай-ақ биыл Ақтау әуежайының ұшу-қону жолағын жөндеу жұмыстары аяқталады. Бұл ішкі және халықаралық рейстер санын көбейтуге септігін тигізбек.

JQ-Aqparat

Сурет: көлік министрлігі