Біз тұтынып жүрген дәрі-дәрмектің көбі – шет ел өнімдері. «Қазақстанда өндіріледі» деген аты бар фармацевтикалық дәрілердің өзі шығарушы елдегі патент пен рецепт бойынша таратылады. Бұл туралы «ҚР дәрілік заттар мен медициналық бұйымдардың айналымы. Заманауи беталыстар» тақырыбындағы конференцияда айтылды.
«Егер бір адам қабылдаған дәріден зардап шексе, оған кінәлі алдымен өндіруші, содан кейін сол дәріні қабылдауға рұқсат берген дәрігерлер. Біз енді дамып келе жатқан мемлекет болғандықтан химиялық препараттарды өндіру жағы әзірше кенжелеп жатыр. Шет елден келген дәрілерді тұтынамыз. Бізде дәрілерді өздері жасап өндіретін зауыт жоқ. Болашақта елімізде химик мамандармен қосылып ғылыми зерттеу институт жасаса, үлкен жетістік болар еді. Көп ел өз дәрілерін тұтынады. Біз де сол деңгейге жетсек дейміз», — деп айтты ҚР Ұлттық ғылым академиясының академигі Камал Ормантаев.
Бүгінгі таңда елімізде қабылдауға рұқсат берілген дәрілік заттар мен медициналық бұйымдардың 14 мыңнан астам түрі тізімде бар. Соңғы 10 жылда Қазақстандағы фармацевтика нарығының көлемі 3 есе ұлғайған.