Көктайғақта құлап жатыр

Петропавлда көктайғақтың кесірінен тұрғындар жаппай жарақат алуда. Соңғы бір аптада 300-ге жуық адам аяқ-қолы сынып, ауруханаға түскен. Бұның себебін дәрігерлер асығыс жүргеннен десе, зардап шегушілер мұз үстіне құм сеппеген әкімдікке ашулы.

Петропавлға көзіне ота жасатуға ауылдан келген Валентина Лотц көшеде құлап, қолын сындырып алыпты. Бір аурудың үстіне тағы бірін жамап алған ол көктайғақтан зардап шеккендердің бірі ғана. Петропавл қалалық ауруханасының қабылдау бөліміне күніне 60-80 адам түрлі сынықтармен түседі екен.

Валерий Грибашов, Петропавл қалалық  ауруханасының травматолог-дәрігері:

 —Жарақат алғандардың  дені  әлденеге сыққандар. Тез жүремін, не жүгіремін деп құлайды. Жұмысқа  сәл ертерек шықса болады ғой.  Соңғы  аптада ғана жарты мыңға жуық   пациентті қабылдадық, үш жүздейі көктайғақта құлағандар.

Дәрігерлердің айтуынша, күніне осында келетіндердің он пайызы  ауыр жарақаттар алғандар. Тіпті, омыртқасы мен мен жамбасын сынғандар да бар. Көшедегі жүргіншілер болса бұл жағдайға қала билігін кінәлайды.Ал қаланың коммуналшылары табиғаттың қатал мінезімен күрес жүріп жатыр дейді. Биыл мұз үстіне себу үшін 3500 текше метр тұз аралас құм дайындапты.

Ғали Әбдірешев, Петропавл қалалық тұрғынүй-коммуналдық шаруашылық бөлімінің инспекторы:

-Таңертең төрттен бастап 13 трактор шығады. Жолды, тротуарларды тазалауға. Құм мен тұз себеміз.