ІІМ сталкинг үшін қылмыстық жауапкершілік қарастырылғанын еске салды

ІІМ азаматтардың жеке өмірі мен қауіпсіздігі заңмен қорғалатынын, ал аңду, қайта-қайта мазалау қылмыс екенін еске салды, деп хабарлайды jasqazaq.kz. 

Polisia.kz мәліметінше, қайта-қайта қоңырау шалу, хабарлама жіберу, әлеуметтік желілер арқылы бақылау, адамның еркінен тыс ізіне түсу – сталкинг. Бұл әрекеттер адамның қауіпсіздігіне және психологиялық жай-күйіне тікелей қауіп төндіреді. Қазақстан Республикасының Қылмыстық кодексінің 115-1-бабына сәйкес, сталкинг фактісіне заңмен қатаң жауапкершілік көзделген. Аталған бапқа сәйкес, 200 айлық есептік көрсеткішке дейін айыппұл салынып, 200 сағатқа дейін қоғамдық жұмыстарға тарту көзделген. Сондай-ақ 50 тәулікке дейін қамауға алу жазасы қарастырылған. Қазақстан Республикасының Конституциясы әрбір азаматтың жеке өміріне қол сұғуға болмайтынын және қауіпсіздік құқығын қорғауға кепілдік береді. Заң бұзушылық – міндетті түрде жауапкершілікке әкеп соғады. Өзге адамның «Жоқ» деген жауабына міндетті түрде құрметпен қарау міндеттелген.​Сондықтан қудалау, аңду, жүйелі түрде мазалау әрекеттері орын алса, дереу 102 нөмірі арқылы полицияға хабарласу керек.

JQ-Aqparat

Сурет: yur.kz