Елбасы: Кеңес Одағының ыдырауы табиғи процесс еді

Кеңес одағының ыдырауы табиғи процесс болды. Бұл туралы «Россия 24» телеарнасына сұхбат берген Мемлекет басшысы Нұрсұлтан Назарбаев мәлім етті, деп хабарлайды ҚазАқпарат. «Өткеніміздің жақсы немесе жаман болуы  — тарих еншісінде. Тарихты қайта жасай алмайсың және шартты рай бұл ретте орынсыз. Мен адамдардың барлық талқылауларын оқимын, естимін. Маған әр уақытта да осы сауалды қоятындықтарын да түсінемін. Мен сол уақыттағы дауылдың ортасында қалдым десем де болады. Барлығын өз көзіммен көрдім, сезіндім. Әрине, уайымдадым да. Егер сіздердің естеріңізде болса, осынау буырқанған пікірталастар соңғы жылдары халық депутаттары съезінде жүріп жатқан кезде Орталық Азия мен Қазақстанның депуттары реформалар мен Кеңес одағын сақтап қалу жағында болған еді. Осылай болды, өйткені қарым-қатынас сондай еді. Түрліше айтып, жорамалдарға ерік беруге болады. Бірақ, Одақтың ыдырауы бұл табиғи процесс», — деді Назарбаев. Осы ретте Мемлекет басшысы бәсекелестікке шыдай алмайтын компаниялардың барынша табысты компанияларға жұтылып кететіндігін мысалға келтірді. Елбасының атап өтуінше, Кеңес одағы барлық соғыстарда жеңіске жеткенімен, жаһандық экономика жарысында оның экономикалық ресурстары жетіспеді және соның салдарынан КСРО-ның саяси жағдайы жеңіліске ұшырады.

ҚазАқпарат