Елбасы Иран президентіне көңіл айтты

Нұрсұлтан Назарбаев Иран Ислам республикасының президенті Хасан Руханиге көңіл айту жеделхатын жолдады деп хабарлайды Ақорданың баспасөз қызметіне сілтеме жасаған NUR.KZ.

Мемлекет басшысы Ирандағы жолаушылар ұшағы апатының салдарынан көптеген адамның қаза болғаны туралы хабарды зор күйзеліспен қабылдады.

«Қазақстан халқының және жеке өзімнің атымнан қаза болғандардың туыстары мен жақындарына көңіл айтып, қайғыларына ортақтастығымды білдіремін», – делінген жеделхатта.
Еске сала кетейік, 19-ақпанда Иранның Исфахан провинциясында бортында 66 адам болған жолаушылар ұшағы апатқа ұшырады.

Тегеран-Ясудж ішкі рейсін орындаған әуе кемесінде 60 жолаушы мен экипаждың алты мүшесі болған.