Экс-дипломат ісі: сот Сәкен Мамашты үйқамақта ұстаудан бас тартты

Қазақстанның Біріккен Араб Әмірліктеріндегі елшінің кеңесшісі болған Сәкен Мамашқа әйелін жылдар бойы ұрып келді деген айып тағылып, іс сотқа жетті.  

Сәкен Мамаштың адвокаты Бейбітжан Сайлауұлының айтуынша, бұрынғы дипломат жасырынбаған және тергеу органдарында айыпталушының Қазақстаннан кетуге әрекет жасағаны туралы сенімді дәлел жоқ.

— Мен ұстау түріндегі бұлтартпау шарасын қоғамнан оқшаулауға байланысты емес жеңілдеу түріне өзгертуді сұраймын, — деді Бейбітжан Сайлауұлы.

Қорғаушының мәлімдеуінше, Сәкен Мамаш әрдайым тергеу органдарының шақыруы бойынша келіп отырған және тергеу шарттарын бұзбаған.

Алайда судья Артур Абдыханов айыпталушыны үйқамақта ұстауға негіз жоқ деп тауып, өтінішті қанағаттандырмады.