Депутат Дәулет Мұқаев «тұсау кесуде тұрған ештеңе жоқ» дейді

Соңғы кезде тұсау кесуді жиілеткен Мәжіліс депутаты Дәулет Мұқаев сынның астында қалғаны белгілі. «Осы депутаттың айналысатын ісі ме» деген сауал әшейін бер жағы екен, «іш киімін қаттап, тұсауын кесіп жүре берсін» деген бір журналистің сөзі кімге болса да қатты тиетіндей-ақ.

Ал депутаттың өзі ешкімнің сөзіне пысқырмайтын сияқты. Әлеуметтік желіде ол тұсау кесу рәсімін он жылдан бері жүргізетінін, о баста жақын таныстарының балаларының тұсауын кесуден бастағанын айтып ақталды. Оның пікірінше, тұсау кесуде тұрған ештеңе жоқ. «Біріншіден, бұл қазақтың салт-дәстүрі. Екіншіден, осыны көріп қазақтың дәстүріне сіңісіп жатқан өзге ұлт азаматтары да бар. Осы уақытқа дейін орыстың да, кәрістің де тұсауын кестім. Одан теріс нәрсе іздеудің қажеті жоқ», — дейді.

Депутат жұмыс уақытында тікелей кәсіби қызметімен айналысатынын, ал тұсау кесу сияқты рәсімін жұмыстан тыс, демалыс кезінде өткізетінін айтады.
Бірақ бастапқы кездегідей емес, қазір Дәулет Мұқаевтың Мәжіліс қабырғасында белсенділік танытқаны онша байқалмайды.

JQ-Aqparat