Бір жыл өткенде: Алмас Кішкенбаев ренішін білдірді

Әнші Алмас Кішкенбаев әлеуметтік желідегі парақшасында жазба жариялап, өзіне қатысты жағдайға көңілі толмайтынын аңғартты. Ол өз атын «тарихтан жойғысы келетіндер бар» екенін айтып, соған қарамастан өмірдің жалғасатынын жеткізген.

«Менің атымды тарихтан жойғысы келеді екен. Көрейік… Күтейік… Өмір жалғаса береді, сіздер барда мен өшпеймін…», – деп жазды ол.
Сондай-ақ Алмас Кішкенбаев барлық телеарналарда «қара тізімде» жүргенін білетінін де атап өтті. «Қарапайым халықтың алдында мен жәй ғана әншімін. Өнерімді құрметтейтін тыңдармандарым бар. Оны да артық көрсеңіздер, айтарға басқа сөзім жоқ…», – деп түйіндеді ол.

Бірақ ол қай телеарнаның қара тізімінде екенін айтпады.

Еске түсірсек, осыдан тура бір жыл бұрын әншінің басы дауға қалған болатын. Сол кезде ол 17 жастағы балаға сыра ішуді ұсынып, кейін тиіскен деген ақпарат тарап кетті. Осы қылығы үшін ол 15 тәулікке қамалған болатын.

JQ-Aqparat

 Фото: @a.kishkenbaev