БАӘ-ге қашып кеткен алаяқ елге қайтарылды

Өзін мұнай компаниясының өкілі деп таныстырған әйел кәсіпкермен келісімшарт жасасқан. Ол оған «тиімді» келісімшарт үшін 120 мың доллар берген. ҚазАқпарат хабарлағандай, «10 қарашада алаяқтық жолмен кәсіпкердің 120  мың доллар ақша қаражатын иемденген  қазақстан азаматшасы  В.Ким Біріккен Араб Әмірліктерінен қайтарылды. БАӘ құзыретті органдары мәлімдегендей, оны қайтару туралы ҚР Бас прокуратурасының сұрауы қанағаттандырылған. Осы жұмысты  Қазақстанның БАӘ-дегі Елшілігі мен ҚР ІІМ Интерполы бірлесе жүргізді. «Айыпталушы 2011 жылы өзін мұнай компанияларының бірінің қызметкері ретінде таныстырып, күкірт жеткізу бойынша тиімді келісімшарт жасасу мүмкіндігіне қатысты кәсіпкерді алдаған. Келісімшарт жасасу шығындарына оның өтініші бойынша 120 000 доллар сомасында ақша қаражаты берілген. Ақша алғаннан кейін, ол қашып  кеткен», — деп  айтылған Бас прокуратура мәлімдемесінде. Қазіргі уақытта Ким Алматының тергеу изоляторына қамалды.