Қазақстан жаңғырмалы қуат көзіне өтуге дайын

Сарапшылардың пікірінше Қазақстан жаңғырмалы қуат көзіне өтуге толық дайын. vlast.kz хабарлағандай, бұған еуропалық институттардың жүргізген зерттеуінен алынған дерек дәлел.

Қазақстан 2050 жылға қарай электроэнергетика жүйесін жаңғырмалы қуа көзіне толығымен ауыстыра алады. Бұл туралы Астанада өтіп жатқан «Болашақ энергиясы» форумының «Қоршаған ортаны қорғау саласындағы Халықаралық экономика және саясат» атты 11-конференциясында Energy Watch Group ұйымының жоба жетекшісі Комила Набиева мәлім етті. Ол «Менің білуімше бұл елде энергетика саласында жаңғырмалы қуат көзінің үлесін 50 пайызға жеткізу мақсатында арнайы мемлекеттік бағдарлама қабылданған. Біз финнің технологиялық университетімен бірлесе зерттеу жұмысын жүргіздік. Оған сәйкес, Қазақстанның бұл көрсеткішке уақытынан бұрын жету мүмкінігі бар. Тіпті, бұл салада әлемдік көшбасшылардың тізіміне іліге алады. Ол үшін потенциал мен технология да бар», — деп атап өтті. Оның айтуынша, мұндай нәтижеге қол жеткізу үшін бизнеске қолайлы жағдай жасап, жаңғырмалы қуат көзін дамыту үшін инвестор тарту қажет.

«Қазақстанға халықаралық инвесторлардың қызығушылығы күннен күнге артып отыр. Себебі бұл елдің мүмкіндігі жеткілікті. Тіпті жел қуатын пайдаланып қана 2030 жылға дейін Қазақстанды толыққанды энергиямен қамтамасыз етуге болады. Бір сөзбен айтқанда, өз мүмкіндігіңді пайдалана білу керек» — дейді К.Набиева. Сондай-ақ, оның айтуынша, институт келесі жылы әлемдегі энергетика жүйесін жаңғырмалы қуат көзіне ауыстыру бойынша зерттеу жұмысын бастайды. Ал Energy Watch Group – бұл энергетика тақырыбын зерттейтін ғалымдардың шоғырланған ортасы.