Аурухананың төбесі опырылып науқастың басына құлап түскен (видео)

Қызылордадағы су жаңа балалар ауруханасының төбесі түсіп кетті. Оқыс оқиға демалыс күндері бесінші қабатта орналасқан пульмонология бөлімінде орын алған. Бұл туралы NUR.KZ порталына емделушілер айтып берді.

«Кешке таман көрші палатада тарсылдаған дыбыс шыққан соң жүгіріп барсақ, төбедегі сылақ опырылып бір әйелдің басына түскен. Құдай сақтағанда бес айлық баласы аман. Дереу дәрігерлер келіп, зардап шеккен келіншекті басқа жаққа алып кетті. Біз қорқып ауруханадан шығып кеттік» ,- дейді атын айтудан бас тартқан куәгер.

Облыстық балалар ауруханасы болған жәйтті растады. Әкімшіліктің айтуынша, аурухана 2016 жылдың желтоқсан айында ғана қолданысқа берілген су жаңа ғимарат екен.

— Келіншек төсек астынан баласының заттарын алайын деп еңкейген кезде төбедегі сылақ опырылып мойнына түскен. Абырой болғанда баласы дін аман. Зардап шегушіні дереу толық тексеруден өткіздік, ауыр жарақат алмапты. Қазір біз бесінші қабаттағы осында төбесінің сылағы түскелі тұрған үш палатаны анықтап, есіктеріне құлпы салып қойдық. Аурухана басшығылы құрылыс компаниясының өкілдерін шақырып жөндеу жұмыстарымен келісіп жатыр ,- деді пульмонология бөлімінің меңгерушісі Ақмарал Төлебекқызы.

Куәгерлер жіберген видео.