Атырауда жоғалған Наурыз бен Мирамгүлдің денелері табылды

Атырау облысында жоғалып кеткен Жангелдин ауылы тұрғындарына қатысты қылмыстық іс бойынша жаңа деректер шықты, деп хабарлайды jasqazaq.kz.

«Ақ жайық» басылымының мәліметінше, іздестіру кезінде отбасының тағы екі мүшесі – Наурыз бен Мирамгүлдің мәйіттері табылды.  Алдын ала мәлімет бойынша, олардың денелері Атыраудағы Геолог ықшамауданында орналасқан үйдің ауласына көмілген. Мәйіттің қайда екенін күдікті күйеубала Сұлтан Сәрсемалиев айтып берген. Бұл үйді негізгі күдікті бұрын жұбайымен бірге жалдап тұрған.
Қылмысқа марқұмдардың күйеу баласы Сұлтан Сәрсемалиев күдікті ретінде қарастырылып отыр. Ол бұған дейін шетелге қашып, кейін Индонезияда ұсталған. Кеше Сұлтан мен Ақбаян елге жеткізілгені мәлім.

Қазір іс бойынша тергеу жалғасуда.
Еске салайық, Жангелдин ауылында тұратын отбасы 2025 жылдың соңында белгісіз жағдайда жоғалып кеткен болатын.

JQ-Aqparat

Сурет: ашық дереккөз