Атырау магистраль желі бөлімшесінің директоры қамауға алынды

Атыраудағы «Қазақстан темір жолы» АҚ «Атырау магистраль желі бөлімшесі» филиалының директоры қамауға алынды. Антикордың мәліметінше, Елубай Сапаров қызмет бабын пайдаланып кәсіпкерден 1 жарым миллион теңге пара алған. Бұл туралы КТК телеарнасы хабарлады.

Қазір лауазымды тұлға тергеу абақтысында отыр. Тергеу осыдан бір ай бұрын басталған. Бірақ Атырау облысы сыбайлас жемқорлыққа қарсы іс-қимыл департаменті бұл іске қатысты өзге ақпарат жариялауға болмайтынын айтты.

Нұрлан Жахин, Атырау облысы бойынша сыбайлас жемқорлыққа қарсы қызмет басшысының бірінші орынбасары:

— Өзге де жәбірленушілерді анықтау мақсатында Сапаровтың құқыққа қайшы әрекеттерінен зардап шеккен азаматтарды Атырау облысы бойынша сыбайлас жемқорлыққа қарсы ісқимыл департаментіне дереу хабарлауды сұраймыз: 71-75-07, 8702 609 68 49. Өзге ақпарат Қылмыстық процестік кодекстің 201-бабына сәйкес тергеу мүддесіне сай, жария етілмейді.