Астанадағы автобус паркі 8 жасар Алуаға өмір бойына қаржылық көмек көрсете алмайтынын мәлімдеді

Астанадағы автобус апатынан кейін екі аяғынан айрылған сегіз жастағы Алуаға №1 автобус паркі өмір бойы көмек көрсететіні туралы ақпарат шындыққа жанаспайтын болып шықты, деп хабарлайды jasqazaq.kz.

Бүгін №1 автобус паркі осыған қатысты түсінік берді.
Хабарламада: «№1 автобус паркі жол апатынан ауыр жарақат алған Алуа Бекеннің отбасына жан-жақты қолдау білдіреді. Біз отбасының жағдайына шын жүректен алаңдаймыз және алғашқы күннен бастап байланыстамыз. №1 автобус паркінің басшысы Мадияр Тұқпатов пен Алуаның туыстары арасындағы жеке кездесуде моральдық қолдау көрсетіліп, заң аясында көмектесуге дайын екеніміз айтылды. Алайда мемлекеттік кәсіпорын ретінде №1 Автобус паркі заңда бекітілген рәсімдерсіз өмір бойына қаржылық көмек көрсетуге уәкілетті емес екенін атап өтеміз», — делінген.
Парк басшылығының айтуынша, төлемдер мен қосымша көмек тергеу мен сот шешімінен кейін заңға сәйкес беріледі.

JQ-Aqparat