Астанада Халықаралық жасыл технологиялар орталығын құру бастамасын 86 ел қолдады

«Астана ЭКСПО-2017» халықаралық көрмесі аяқталған соң соның инфрақұрылымынң негізінде Халықаралық жасыл технологиялар орталығы құрылады. lsm.kz хабарлағандай бұл бастаманы 86 ел 15 халықаралық ұйым қолдап отыр.

Бұл туралы Астанада өтіп жатқан «Болашақ энергиясы» форумының «Қоршаған ортаны қорғау саласындағы Халықаралық экономика және саясат» атты 11-конференциясында мәлім болды. Әділет министрлігі Зияткерлік меншік құқығы департаментінің директоры Наталья Пан «Бүгінгі таңда экожүйені сақтамай, экономиканы дамыту мүмкін емес. Еліміз жаңаратын энергия көздеріне көшу мен энергетикалық процестерде энергияның жұмсалуын қысқартуға барынша күш салады. Осы орайда 2013 жылы «жасыл» экономикаға көшу концепциясын қабылдадық. Бұл құжат «Экономиканы үшінші жаңғырту» мемлекеттік бағдарламасы бойынша жүзеге асып отыр» — деді. Оның айтуынша, әлемде газды қоса алғанда дәстүрлі энергия көздерін тұтыну көлемі азайып келеді. Сол себепті жаңаратын энергия көздерін қолдану көлемі артып жатыр. Осы саланы дамытуға және инновациялық жаңалықтар енгізу үшін ҚР кейбір заңнамалық актілеріне өзгерістер мен толықтырулар енгізілген. В.Пан «Жаңаратын энергия көздерін қолдау мақсатында арнайы Заң қабылданды. Аталған сектор бойынша бәсекеге қабілеттілікті арттыру үшін заңнамалық актілер толықтырылды. Жылыжай газдары мен озон бұзушы заттарды реттеуді заң жүзінде қарастырып жатырмыз», — деп атап өтті.

Еліміз бұл салада Заң қабылдаумен ғана шектелмейді, сонымен бірге мобильді гидроэлектростанция экспонаты, автономиялық жүйе жобасы, видеобақылау жүйесіндегі қауіпсіздікті қамтамасыз ету, кремний және күн батареясының эксперименталды үлгісі секілді қазақстандық патент алған өнертабыстарды ұсынады. Осы уақытқа дейін «жасыл» экономика саласын дамыту аясында екі жарым мыңнан аса технология патенттелген. В.Панның айтуынша, 2015 жылдан бастап «жасыл» экономикаға көшу тұжырымдамасы аясында 2593 «жасыл» технология патенттелген. Олардың 2/3 бөлігі табиғатты қорғау технологиялары, ал 45 пайызы қатты минералды бөлшектерге қатысты технологиялар болып отыр.