Қарағандыда өз күйеуін өлтіруге тапсырыс берген «Бәйтерек» балабақшасының тәрбиешісі 11 жыл 3 айға сотталды.
Тәрбиешінің күйеуін өлтірмекші болған оның нақсүйеріне сот 16 жыл жазасын өтеу үкімін тағайындады. «Сот сотталушыны ҚР ҚК-інің 24-бап 3-99-бөлімі және 28-бап 4-99 бөлімінде көзделген «Алдын ала келісу бойынша, оларға қатысты емес жағдайларға байланысты аяғына дейін жеткізілмеген, тұлғалардың топтасуымен адам өміріне қастандық ойлау» бойынша кінәлі деп танып, 11 жыл 3 ай бас бостандығынан айыру жазасы тағайындады. Әйелдің кішкентай үш баласының болуы, істеген ісіне өкінетіндігі мен қылмысқа қатысты басқа кінәлілерді анықтау бойынша тергеудегі белсенділігі үшін жазасы жеңілдетілді. Сот сотталушыға қатысты ауырлататын мән-жайларды анықтаған жоқ», — деді Қарағанды облысы қылмыстық істер жөніндегі мамандандырылған ауданаралық сотының судьясы Исламхан Есенбаев. Кристина Әбішева кінәсін толықтай мойындады. Оның кінәсін мойындамай, барлық жауапкершілікті құрбысына артқан нақсүйері Николай Пяткинді сот Қылмыстық кодекстің аталған баптары бойынша кінәлі деп таныды. «Сотталушының әрекеттерінде жазасын жеңілдететін мән-жайлар болған жоқ. Ол бұған дейін ҚР ҚК-інің ескі редакциясындағы 96-бабында қарастырылған «Адам өлтіру» және ҚК-інің 179-бабы «қарақшалық шабуыл» бойынша сотталып, 14 жыл бас бостандығынан айрылған болатын», — деді судья Есенбаев үкімді хабарлау кезінде. Еске сала кетейік, бұған дейін Қарағанды облысы ішкі істер департаменті ұйымдасқан қылмыспен күрес басқармасының қызметкерлері Қарағандыдағы тапсырыспен кісі өлтірудің алдын алғандығы туралы хабарлаған болатынбыз.
WhatsApp: +7 705 717 9113
