Алматыда Земфираның концерті өтпейтін болды

Ресейде «иноагент» мәртебесін иеленген Земфира Рамазанованың Алматыдағы концерті өтпейтін болды, деп хабарлайды jasqazaq.kz.
Бұл туралы әнші өзінің Instagram парақшасында хабарлады.
Оның айтуынша, әу бастан ұйымдастыру жұмыстары қиынға соққан. Келіссөз төрт айға созылып, концерт алаңы ауыстырылған. Ақыр соңында «Хан Тенгри» стадионына жауапты ректор рұқсат бермепті.
«Мен үшін афиша қасиетті, сондықтан түсінбеймін… Өкінішті. Қазақстан, мен әрекет жасап көрдім. Соңғы кездесуден қалған жағымсыз әсерден арылып, әдемі қоштасқым келген» деп жазды әнші.
Осыдан екі жыл бұрын Алматы мен Астанада өнер көрсеткен Земфира кетерде шулатып кеткен. Басқасын айтпағанда, әлеуметтік желіде Қазақстанды кішкентай әріппен жазып, мұқатқаны жұрттың ашуына тиген. Бірақ кейін қайтып келетіні есіне түсті ме екен, соңынан кешірім сұрап тынды.
«Су ішетін құдыққа түкірме» деген халық даналығы осындайда еске түседі.

Jas Qazaq
Сурет:: Instagram/zemfiralive