Алматыда «Юбилейный» дүкені өртенді

10 мамыр 2016, 11:54

Бүгін түнде Алматыда Алмалы ауданы Абылай хан даңғылы 74 үйде орналасқан «Коровабар» дәмханасынан өрт шығып, артынан газ баллоны жарылды. Өрт дәмхана орналасқан 7 қабатты үйге ұласқан, деп хабарлайды BNews.kz.

«Өрт шыққаны туралы хабарлама таңғы сағат 04.37-де түсті. Өрт сөндірушілер жеткенде үйге жапсарлас салынған «Коровабар» дәмханасының шамамен 800 шаршы метрге жуық ауданы өртеніп жатқан. Құтқарушылар бір уақытта өрт сөндіріп, үйдің артқы жағынан тұрғындарды қауіпсіз орындарға көшірді», — дейді ҚР ІІШ Төтенше жағдайлар комитетінің ресми өкілі Руслан Иманқұлов.

Оның айтуынша, сағат 05.23-те газ баллоны жарылған.

«Құтқарушылар жоғарғы қабаттардағы тұрғындарды жылжымалы сатылардың көмегімен түсірді. жалпы саны 7 адам құтқарылып, 120 адам қауіпсіз орындарға көшірілді, оның үшеуі балалар. Бір адам газға уланып, жедел ауруханаға жеткізілді. Апат орнында 21 техника, Өрт сөндіру қызметінің 115 маманы, жергілікті полиция, жедел жәрдем, су арнасы және энергетика қызметкерлері жұмыс істеді», — дейді Р.Иманқұлов.

Жедел шараларды қолға алудың арқасында, өрт таңғы сағат 06.36-да толығымен сөндірілді. Өрт жалпы ауданы 1100 шаршы метр жерге жайылды. Қазір өрттің шығу себептері анықталып жатыр.