Алматы тауларында от жаққандарға 500 мыңнан астам теңге айыппұл салынды

Алматыда Іле Алатау ұлттық паркінде от жаққан бес адам әкімшілік жауапқа тартылды, деп хабарлайды Қазақпарат.

Қалалық ТЖД баспасөз қызметі мәліметінше, Алматы тауларында 180-нен астам бірлескен рейд жүргізілді. Оның барысында демалушыларға 50 мыңнан астам жадынама таратылды. Сонымен қатар ерекше қорғалатын аймақтарда өрт жағудың 117 фактісінің жолы кесілді.

«ҚР ӘҚБК 505 бабы бойынша 112 адам ескерту түрінде, осы бап бойынша қайталап өрт қауіпсіздік бұзушылыққа жол берген 2 адам жалпы сомасы 76 575 теңге айыппұл түрінде жауапкершілікке тартылды. Бұдан бөлек ҚР ӘҚБК 367-бабы бойынша-жалпы сомасы 459 450 теңге айыппұл түрінде – 3 адам әкімшілік жазаға тартылды»,- деп хабарлады ведомстводан.

Қалалық ТЖД мамандары таулы жерде шылым шегіп, от жақпауға кеңес береді.

Айта кетейік, Іле Алатау ұлттық паркінде ыстық тамақ дайындау үшін арнайы жабдықталған 14 орын, Алма-арасан шатқалының аумағында -12 орын, «Бутаковкада» 2 орын бар.