Александр Бородюк: «Жасыл алаңда келімсектер емес, қазақстандықтардың ойнағанын қалаймын»

Кеше Польша мен Қазақстан матчынан бір күн бұрын бір топ журналистер, атап айтқанда «Хабар» арнасының тілшісі Ермұхамед Мәулен, Vesti.kz порталының тілшісі Руслан Ошуров, Prosports.kz сайтының тілшісі Артем Кравченко, Kazfootball.kz сайтының бас редакторы Нағи Бақытбеков, танымал тележүргізуші, блогер Алмас Алтай және «Жас қазақ» газетінің арнаулы тілшісі Арстанбаев Мадияр Варшавадағы Marriot қонақүйінде футболдан Қазақстан ұлттық құрамасының бас жаттықтырушысы Александр Бородюк және оның көмекшілері, Қазақстан футбол федерациясының баспасөз хатшысы Ербол Каиров ресми емес кездесу өткізді.

Сырт көзге суық көрінетін Александр Бородюк бізді күлімсіреп қарсы алды. Келгенімізге алғыс білдірген бапкер журналистермен емен-жарқын әңгіменің жақсы бастама екенін айтып, қазақ футболы туралы сыр шертті.

— Ұлттық құрама туралы негативті пікірлер жиі айтылады. Бұл орынды да. Бірақ сын объективті болу керек. Проблеманы әріден қозғасаңыз, түйін өзінен өзі тарқатылады. Ол, әрине балалар футболы, инфрақұрылымның нашарлығы, ішкі чемпионат деңгейінің төмендігі деп кете береді. Ақталғаным емес, бірақ аталған мәселелер ел футболының дамуына кері әсер етіп, оны тежеп тұр, — деп бастады әңгімесін Александр Гейнрихұлы, — Соған қарамастан алға жылжу керек. Монтенегро құрамасымен болған ойынды алып қарайықшы. Қарсыластың қай ойыншысын алсаңыз да, деңгейі жағынан біздің жігіттерден жоғары. Қазақстандық ойыншылардың өздеріне деген сенімдері төмендеу болды. Бірақ ойындағы қателіктер матчтың мазмұнына сай емес. Қазіргі құрамдағы футболшылар Қазақстандағы ең үздік ойыншылар екеніне сенімдімін.

Балалар футболы хақында

— Сөз басында балалар футболы дегенді айттым. Егер алматылық «Қайраттың» академиялары сияқты мектептер елдің әр түкпірінде болса, онда сөзсіз футбол дамиды. Қарапайым аксиома. Тіпті балаларды жаттықтырушы маман балалар мен жасөспірімдерге арналған жаттығуларды, тактикалық-техникалық оқытудың қыр-сырын жетік меңгеруі қажет.Қазақстан да Ресей сияқты жер көлемі жағынан алпауыттардың қатарына жатады. Бәлкім шалғай жатқан

бір ауылда ерекше дарынды балалар өсіп келе жатқан шығар. Ал біз оны көрмейміз. Балалар футболын дамыту, инфрақұрылымын жетілдіру футболдың сапалы болуына зор ықпалын тигізеді.

Ішкі чемпионат туралы

— Қазақстан чемпионатында, жасыратыны жоқ, екі команда ғана бәсекеге қабілетті деп айта аламыз. «Астана» мен «Қайрат» қана тең дәрежелі клубтар. Аталмыш ұжымдар өзге командалармен, мәселен, елордалық ұжым «Оқжетпеспен» ойнайды десе, кімнің жеңетінін алдын ала біліп тұрамыз. Көп жағдайда солай.Осыдан кейін бәсекелестік туралы айтудың өзі әбестік емес пе?! Футболшының мықты болып қалыптасуы бәсекелестіктен туады.

Келімсектерді ұлттық құрамаға тарту

— Сырттан келген шетелдік ойыншыға қазақстандық төлқұжат беріп, ұлттық құрамаға шақыру тығырықтан шығудың жолы емес.Жергілікті ойыншыларға, соның ішінде жастарға қашанда сенім арту керек. Өйткені ол өзіңдікі, ойнай алмаса да! Менің принципім осы. Бұл – бір. Екіншіден, шақыртқан ойыншының жақсы ойнайтынына кім кепіл? Сенген адамың сеніміңе селкеу түсірсе, бәрі бекер. Үшінші – кейбір ойыншының қос төлқұжаты болуы мүмкін. Мәселен, Генрих Шмидтгаль, Меркель, Энгелдерді құрамаға тарту жайы туралы жиі айтылады. Олар Германия азаматтары. Олардың Қазақстан ұлттық құрамасында ойнауға заңдық құқықтары жоқ..

Бірінші лигадағы түйткіл

«Хабар» агенттігінің тілшісі Ермұхамед Мәулен бірінші лигадағы проблемаларды айтып өтті. Оның айтуынша, аталмыш лига клубтары қаражаттың тапшылығынан ұшақпен ұша алмайды. Маңғыстаулық «Каспий» Өскеменге пойызбен үш күн жүріп барады. Қайтар жолы да 3 күнге созылады. Мәселен, команда құрамында талантты жас ойыншы болса, оның бір аптада неше рет жаттығатынын, қанша минут ойнайтынын елестету де қиын. Kazfootball.kz сайтының бас редакторы Нағи Бақытбеков бірінші лиганы үш конференцияға бөлуді ұсынды.

Оған Бородюк былай жауап берді:

— Бұл өте жақсы идея. Қазақстанның аумағы өте үлкен. Сол себепті футболшыларды сұрыптайтын ұжым мұны қаперінде ұстау керек. Бұл уақытты, қаржыны үнемдейді. Алдағы уақытта бұл мәселені көтеретін боламын. Бірақ бәрін атқарушы орган шешеді.

Жолдастық кездесулер көп болса…

— Біз FIFA кестесін қай аезде де қаперде ұстап отырамыз. Шама келгенше жолдастық кездесулерді көптеп өткіземіз деген жоспарымыз да жоқ емес. Қазір екі елмен келіссөз жүргізіліп жатыр. Бұл еуропалық елдер. Ол әзірге, құпия. Ресеймен де өткізуге болады. Негізі, көптеген мемлекеттер бір-екі жыл бұрын жоспар жасайды, әрі сол бағытта жұмыстар атқарады. Біз де сол стандарттарды енгізуіміз керек. Алдағы уақыта оған да қол жеткіземіз деп топшылаймын.

— Бұрын Достастық кубогы болатын. Соған ұқсас етіп посткеңестік бірнеше елді шақырып турнир өткізуге де болар еді.

Ұлттық құраманың базалық клубын жасай аламыз ба?

— Бұл бұрыннан бар тәжірибе. Бізде «Астана» мен «Қайрат» базалық клубтар іспеттес. Өйткені, қос клубтың көптеген ойыншылары ұлттық құрама сапына шақыртылады.

Түйін

Міне, бүгінгі әңгіменің бір парасы осы болды. Пайдасы бар жиын. Бейресми. Александр Бородюк пен оның командасы туралы аз айтылып, аз жазылып жүрген жоқ. Қаралаушылар жетерлік. Сол себепті осы жазғанымыз жанкүйер құлағына жетсе екен дейміз. Сын айту – оңайдың оңайы. Оны бірлесе шешу, проблеманың түбіне үңіліп қарау мүлде бөлек нәрсе. Біз, журналистер, жанкүйер мен ұлттық құраманың ортасындағы алтын көпір болсақ – мақсатқа жеткеніміз. Бізде бір ғана команда бар. Ол – Қазақстан ұлттық құрамасы.