Алаяқ әйелдің адымы қысқа

Екібастұз қаласында пәтер алаяқтығы бойынша күдікті 56 жастағы азамат ұсталды.

Айта кетейік, күдікті бұған дейін қылмыстық жауапкершілікке тартылған. Павлодар облыстық ішкі істер департаменті баспасөз қызметінің хабарлауынша, Екібастұз қаласының бірнеше тұрғыны алданып қалғаны туралы полицияға шағымданған. Bnews.kz хабарлағандай, Қылмысты ашу мақсатында арнайы тергеу тобы құрылған.
«Тергеушілер алаяқтық жасады деген күдікпен 56 жастағы әйелді ұстады. Ол алдын ала жоспарланған сызбамен жұмыс істегені анықталды. Пәтер іздеп жүрген тұрғындарға баспана сатып алуды ұсынып, кейін жалған келісімшарттар жасаған. Бір қызығы, тұрғындар оның сөзіне сеніп, ақша берген. Осыдан 6 жыл бұрын ол алаяқтық үшін сотталған болатын», – дейді ведомствоның баспасөз қызметінен.
Полицейлердің мәліметінше, екібастұздық қылмыстық істің үш дерегі бойынша күдікті деп танылған. Алаяқ құрбандарын алдап-соғып, 6 млн теңгені қалтасына басқан.
Қазір ол уақытша қамау изоляторына тоғытылды. Тергеу амалдары жүріп жатыр.