АЛАМЫН ДЕП, АБАҚТЫҒА ҚАМАЛДЫ

Қарындасым күлді маған қарап. Медицина академиясын қызыл дипломмен бітірген Салтанаттың жұмыс іздеп, емдеу мекемелерінің табалдырығын тоздырғанына «алты ай аунап» кеткенін білетін едім. Жұмыс тапқан екен деп қуанып қалдым:

— Иә, қуаныштысың ғой, жұмыс тапқансың ба?

— Жоға, — деді ол тағы да жымыңдап, — мен білдім, неге жұмысқа тұра алмай жүргенімді.

— Неге екен? – дедім мен таңданып.

— Пара бермеген соң тұра алмай жүр екенмін ғой. Мінекейіңіз, ағатайым, көре қойыңыз да, түсіне қойыңыз.

Салтанат ұсынған бір жапырақ қағазға көз жүгіртіп шықтым. Сөйтсем, Сыбайлас жемқорлыққа қарсы іс-қимыл Ұлттық бюросы Жамбыл облыстық департаментінің ресми мәліметінде «тайға таңба басқандай» былай делініпті: Жамбыл облыстық денсаулық сақтау басқармасының басшысы Е.Масалимов пен оның орынбасарлары Р.Бижігітова және Г.Жақсыбекова ұсталған. Сондай-ақ, басқарманың мемлекеттік сатып алулар, мониторинг және техникалық бақылау, экономика және бюджеттік жоспарлау бөлімдерінің басшылары Б.Бейсебаев пен И.Аймағанбетов те осы топппен бірге құрыққа түскен екен. Барлығы да Тараз қалалық ІІБ-ның уақытша оқшаулағышына қамалыпты.

Ресми мәліметке жүгінсек, аталған лауазымды тұлғалар облыстағы медициналық мекемелерден 300-ден 10 мың долларға дейін үзбей ақша алып отырыпты.

— Түсіндім, — дедім мен де қарындасыма аңтарыла қарап, — неге сенің ұзақ уақыт бойы жұмысқа орналаса алмай жүргеніңді мен енді өте жақсы түсіндім.

Марат МАМАНБАЙ