Ақтөбедегі беделді оқу орындары дүркіретіп хэллоуинді тойлады

Таяуда ғана ректорлары Сапарбаевтан сөз естіген университеттерде дүркіреп хеллоуин өтті, деп хабарлайды Aktobenews.kz. Қазақ-орыс халықаралық және Қ.Жұбанов атындағы өңірлік университеттерінің студенттері мұндай шараға дән риза екендіктерін жеткізді.

Жыл сайын қазанның 31-ші жұлдызында тойланатын мереке биыл да атаусыз қалмады. Білім ордаларында ұйымдастырылған шараларға жастар көп жиналды. Бет-ауыздарына бояу жағып, қорқынышты кейіпке енген жастар арнайы шоу бағдарлама жасап, соңы би кешіне ұласты.

Қазақ-орыс университетінің желідегі парақшаларында алдын-ала хабарландырулар ілініп, билеттер сатылымға шығарылған болатын. Студенттердің айтуынша, шараны жастар ісі жөніндегі комитет ұйымдастырған.