«Ақтөбе» футбол клубының қызметкерлері ойыншылардың тамағына бөлінген ақшаны өз қажетіне жұмсаған

Ақтөбе облыстық прокуратурасы «Заң және Тәртіп» тұжырымдамасы шеңберінде Ақтөбе футбол клубының қызметін тексерді, деп хабарлайды jasqazaq.kz.

Бас прокуратураның Телеграм-каналында жазылғандай, клубта 250 млн теңгеге қаржылық бұзушылықтар анықталған.
Оның ішінде ойыншылардың трансферлері және әуе тасымалдау бойынша күмәнді мәміле жасау бар. Сондай-ақ ойыншылардың тамақтануына бөлінген қаражатты клуб қызметкерлері жеке қажетіне жұмсаған.

Тексеру қорытындысы бойынша, облыс прокуратурасы Қылмыстық кодекстің 189-бабының 4-бөлігінің 2) тармағы (аса ірі мөлшерде сеніп тапсырылған бөтен мүлікті жымқыру), 361-бабының 4-бөлігінің 1) тармағы (лауазымдық өкілеттіктерді теріс пайдалану) және 190-бабының 4-бөлігінің 2) тармағы (алаяқтық) бойынша 3 сотқа дейінгі тергеп-тексеруді бастады.

Қылмыстық істер тергеп-тексеру амалдарын жүргізу үшін Сыбайлас жемқорлыққа қарсы қызметке жолданды.
Істің тергелуі облыс прокуратурасының бақылауында.

JQ-Aqparat