Адвокаттар куәгер Элмира Нұрбекованың жауабы бір-бірімен қиыспайтынын мәлімдеді

Бүгін Шерзат Болаттың өліміне байланысты кезекті сот отырысында куәгер Элмира Нұрбекова жауап беруін жалғастырды, деп хабарлайды jasqazaq.kz.

Төрт баланың анасы, 33 жастағы Эльмира Нұрбекованы сол күні сотталушылардың бірі шақырған. Барлығы кафеде отырған. Содан кейін дүкеннің алдына барған.

Жәбірленушілердің адвокаты одан пышақ Шерзат Болаттың қай жеріне сұғылғаны туралы қайдан білетінін сұрады.
«Оқиғадан кейін бізді екі күн қатарынан сол жерде ұстады, тамақсыз, ұйқысыз. Бізден 100-ге жуық адам жауап алды. Сондықтан олар не туралы жауап алғаны да есімде жоқ. Мен жауапты орысша бердім. Олар қазақшаға аударып жазды. Басты мақсатым – қол қойып, тез үйіме қайту болды», — деді куәгер.
Сотта жәбірленушілердің адвокаты Нұрбекованың былтырғы қазанда берген жауабының бейнежазбасын қосуды сұрады. Оның айтуынша, Эльмира Нұрбекова жауабын қазақ тілінде берген.

Адвокаттар осы куәгердің Шерзат Болаттың өліміне қатысы бар деген пікірде. Қорғаушы Мейірман Шекеев: «Егер ол оқиға болған жерде өз еркімен жүріп, бәрін өз көзімен көре тұра көмек шақырмаса, біздіңше, оның осы іске қатысы бар», — деп мәлімдеді.

JQ-Aqparat