«Жөргегіндегі нәжісін жегізген». Науқастарды қорлаған студенттің соты созылып кетті (Видео)

Жөргегіндегі нәжісін жегізіп мазақ қылған! Елордада дерті дендеген науқастарға ойына келгенін істеген студенттің соты сағызша созылуда. Бір жылға жалғасқан процесте бүгін де үкім оқылған жоқ. Жәбірленушілердің туыстары енді айыпталушы жазадан оңай сытылып кете ме деп алаңдайды. Бұл туралы КТК арнасы хабарлайды.

Адам нанғысыз сұмдық жағдай Астанадағы клиникалардың бірінде болған. Медицина университетінің жоғары курс студенті онсыз да тағдырынан теперіш көріп айықпас дертпен күресіп жатқан науқастарға көрсетпегенді көрсеткен. Басынан ұрған, қолымен нұқыған, ең сорақысы, мүгедектердің жөргектерін ашып, ондағы нәжісті жеуге мәжбүрлеген. Айуандық әрекетін студент-дәрігер видеоға түсіріп, жора-жолдастары отыратын арнайы чатқа жіберіп отырыпты. Өліммен арпалысып жатқандардың басына пакет кигізген, одан қалса, жерге жатқызып тепкен. Бұл оның достарына да оғаш көрінбесе керек. Керісінше, қолдап-қолпаштап, әлеуметтік желіге таратып жіберген. Төбесінен жай түскендей күй кешкен жәбірленушілердің туыстары сотқа бірден жүгінеді. Алайда істің жылжитын түрі жоқ.

«Ол жасөспірім бала, медакадемия студенті. WhatsApp мессенджері чатын ашып, оны «Сідік» деп атайды. Сол чатқа өзінің араласып жүрген жора-жолдастары қосылады. Соларға осындай видеолар түсіріп, ақпарат таратқан. Сондай-ақ, қазір айтылмаған ақпарат бар. Бұл бала жалғыз өзі істемеген. Оның қасында тағы бір студент болған. Оған қатысты да бөлек қылмыстық іс ашылады деген ақпарат бар», — дейді адвокат Мерхат Ахметолдин.

Хоспис басшылығы желіде желдей ескен видеодан кейін дәрігерсымақты бірден жұмыстан шығарып жіберіпті. Қызметке аларда бойынан күдік туғызар еш белгі көрмеген едік деп отыр. 21 жастағы студент кішіпейіл, науқастардың іші-бауырына кіріп тұрған. Ал қылмысқа қатысы бар екінші студент турасында ләм-мим деп жақ ашпады.

«Болашақ дәрігер дейміз, практикамды осында өткіземін деген соң, біз оны қабылдадық. Бізде жұмыс істеген кезде кішіпейіл, оның адамға деген қарым-қатынасынан, сөйлеу мәнерінен психологиялық өзгерістерін байқаған жоқпын. Енді күнделікті аралап қарап кеткеніммен, жеке былай әрқайсымен… Жұмыс барысын білесіз ғой. Пациенттердің бұдан басқа ұйымдастырушылық жұмыстары бар», — дейді клиника директоры Гүлмира Князьбекова.

Палеативті орталықтан оңай құтылған студент-дәрігер озбырлығын басқа клиникада жалғастырған. Кино сценарийіне бергісіз оқиға науқас балаларды бейімдеу орталығында жалғасады. Мұнда да, тағдыры онсыз да маңдайынан сипамаған балаларды ұрып-соққан. Тіпті сексуалдық сипаттағы қорлық көрсетіпті. О баста мүгедек жандарға зәбір көрсеткен студентке қатысты 10 отбасы шағымданады. Осы уақыт ішінде дерті дендеген бесеуі о дүниелік болған. Содан ба, туыстары әрі қарай сотты жалғастыруды жөн санамапты. Ал сот үкімі әне-міне шығып қалады деп, судьяны торуылдаудан шаршаған басқа отбасылар күдіктінің тіреп тұрған дөкей туысы бар деген пікірде. Егер айыбы дәлелденсе, дәрігерсымақ студент 7 жылға бас бостандығынан айырылуы мүмкін.