Келесі жылы Жәбірленушілерге өтемақы қорына және Арнайы мемлекеттік қорға аудит жүргізіледі

Бюджеттен тыс қандай қорлар Жоғары аудиторлық палатаның тексеру объектісіне айналуы мүмкін? Бұл туралы ведомство төрағасы Әлихан Смайылов Мәжіліс отырысынан кейінгі баспасөз мәслихатында айтты, деп хабарлайды jasqazaq.kz.
Қазіргі уақытта Жоғары аудиторлық палата осындай мекемелердің базасын жасап жатыр. Тізімде шамамен 18 қор бар. Олардың қатарында Ұлттық қор, Бірыңғай жинақтаушы зейнетақы қоры (БЖЗҚ), Әлеуметтік медициналық сақтандыру қоры, Жәбірленушілерге өтемақы қоры, Арнайы мемлекеттік қор бар.
2025 жылы аудиторлық іс-шаралар шеңберінде БЖЗҚ мен ӘМСҚ-ға тексерулер жүргізілді.
2026 жылы Жәбірленушілерге өтемақы қорына және Арнайы мемлекеттік қорға аудит жүргізу жоспарлануда.
«Бұл салада аудит жүргізудің бірыңғай әдістемесінің болмауы олардың жұмыс тиімділігін бағалауда қиындық тудырады. Сондықтан біз Азия даму банкінің қолдауымен халықаралық практиканы зерттеудеміз. Нәтижесінде бюджеттен тыс ресурстарды пайдалану тиімділігін арттыру жөніндегі ұсыныстар әзірлейміз», — деді Әлихан Смайылов.

JQ-Aqparat

Сурет: @auditpalatasy