Жоғалып кеткен тікұшақтың бөлшектері табылды

26 шiлде, 12:49

Төтенше жағдайлар министрлігі Отар елді мекені аумағында байланыс үзілге Әуе қорғаныс күштерінің тікұшағына қатысты оқиғаның мән-жайын анықтау бойынша іздестіру-құтқару жұмыстарын тәулік бойы жалғастыруда, деп хабарлайды jasqazaq.kz.
Төтенше жағдайлар министрлігінің Командалық орталығында жүргізілген ғарыштық мониторинг барысында Алматы облысындағы Сорбұлақ көлінің акваториясында майлы дақтың болуы мүмкін екендігі анықталды.
ТЖМ құтқарушылар тобы шұғыл түрде осы аймаққа шығып, іздеу жұмыстары түнде де жалғасты. Жұмыс барысында қорғаныс министрлігіне тиесілі болуы мүмкін әуе кемесінің фрагменттері табылды.
Оқиға орнында ТЖМ құтқарушылары жұмыс істеуде. Арнайы жабдықтар пайдаланылуда: эхолоттар, ұшқышсыз ұшу аппараттары және суасты дрондары.
Іздестіру-құтқару жұмыстарына жеке құрамнан 200-ге жуық адам, 40 бірлік техника, 15 су көлігі, 4 кинологиялық есептоп және 2 ТЖМ әуе кемесі тартылды.