Жеңіске бірге жетейік!

Jas qazaq газеті мен Chevron компаниясының бірлескен жобасы

Jas qazaq газеті мен Chevron компаниясының бірлескен жобасы
Жобаның мақсаты – ерекше жандарды журналистика жанрларын меңгеріп, сауатты жазуға бейімдеу. Қазір журналистикаға құмар жандар компьютерлік сауаттылық, мерзімді баспасөз және тележурналистика бойынша дәрісте тәжірибесін шыңдап, шағын хабар, ақпарат, мақала жазуға, сұхбат алуға төселіп келеді.
Курсқа қатысушы Жанар Әукенова жетістікке жетудің жолдары туралы ой толғайды.

Құрметті жас спортшылар мен арманшыл жастар!
Мен – Қазақстан Спартакиадасының дзюдо спортынан күміс жүлдегерімін. Бұл жетістікке жету оңай болған жоқ. Әрбір медальдың артында таңнан кешке дейінгі жаттығулар, шаршаған сәттерде төзім таныту, жеңілістен кейін қайта тұрып, жаңа күшпен алға ұмтылу бар.
Дзюдо маған тек спортты ғана емес, өмірді де үйретті. Ол – қарсыласыңды емес, ең алдымен өзіңді жеңудің жолы. Күмәнді, қорқынышты, жалқаулықты жеңе білген адам ғана табысқа жетеді. Әрбір татамидегі белдесу – сенің өмірдегі күресіңнің айнасы.
Күміс жүлде – мен үшін мәренің соңы емес, жаңа жолдың бастауы. Бұл менің мақсатыма жетуіме деген сенімімді арттырып, алтын үшін күресуге шабыт берді. Менің ойымша, әрбір жеңіс – келесі үлкен жетістікке баспалдақ қана.
Сіздерге айтқым келеді:
Егер арманыңыз болса – соған қарай нық қадам басыңыз.
Егер қиындық кездессе – мойымаңыз, ол сізді шыңдайды.
Егер жеңіліп қалсаңыз – бұл жолдың соңы емес, тек жаңа мүмкіндіктің бастауы.
Спорт – тек медаль үшін емес, ең алдымен рухты шыңдау үшін керек. Ол тәртіпті үйретеді, мақсатқа жетуге баулиды, ең бастысы – өз еліңнің намысын қорғауға мүмкіндік береді.
Мен өз үлесім арқылы жастарға бір ғана ойды жеткізгім келеді: еңбек, төзім және сенім – сізді міндетті түрде биікке шығарады. Әрбір күніңізді жеңіске қадам деп қабылдаңыз.
Келешекте сіздердің араларыңыздан да Қазақстанды халықаралық ареналарда танытып, Олимпиада жеңімпаздары шығарына сенемін!
Алға, жас ұрпақ! Алға, Қазақстан спортшылары!

Жанар Әукенова,
курсқа қатысушы