«Жас жауынгер» орталығы ерекше балаларға шекісіз мүмкіндік сыйлайды

Мүмкіндігі шектеулі балалардың қоғам өмірінен сырт қалмай, жан-жақты дамуына арналған орталықтардың маңызы зор. Сондай орталықтың бірі — Шымшаһарда. Қаладағы «Жас жауынгер» спортқа бейімдеу орталығы «Тұсаукесер» жобасы аясында жұмыс істейді. «Қазақстан халқына» қоры 33 600 000 теңге сомасына спорт залды жарақтандырып берген. Орталықтың негізін қалаушы Садық Байымбетов жоба мотивациялық әдістерді, психологиялық қолдауды және кинезотерапиялық тәсілдерді, әлеуметтенуді пайдалана отырып, мүмкіндігі шектеулі балалар мен жасөспірімдердің өмір сүру сапасын жақсартуға бағытталғанын айтады. Қайырымдылық көмек алушылардың нысаналы тобы 18 жасқа дейінгі мүмкіндігі шектеулі балалар екен. Жаттығулар мүмкіндігі шектеулі балаларға арналған қосымша мамандандырылған білім беру (дене шынықтыру-сауықтыру үйірмесі) шеңберінде өткізіледі. «Жас жауынгер» орталығының директоры Садық Бақытбекұлы Jasqazaq.kz тілшісіне мұндағы жұмыс ерекшеліктері туралы айтып берді.

Біздің «Тұсаукесер» жобасы туралы айтып беріңізші. Бұл идея қайдан келді?» деген сауалымызға ол былай деп жауап берді:

«Жас жауынгер» бейімдеу спорт орталығы 2018 жылы Астана қаласында еріктілер тобымен ашылды. Екі жылдан соң-ақ айтарлық көрсеткішке қол жеткіздік. 2020 жылы бізді Әлем және Қазақстанның Олимпиада чемпиондары қолдап, біздің орталық «Жылдың үздік ұйымы» атанды. Президентіміз Қасым-Жомарт Тоқаевтың қолдауымен «Жомарт жүрек» сыйлығының лауреаты атанды. 2022 жылдан бастап «Қазақстан халқына» қорының қолдауымен еліміздің бес қаласында бөлімдеріміз ашылды. Атап айтар болсам, Астана, Шымкент, Атырау, Семей және Алматы қалаларында ашылып, жоба сәтті басталғаннан кейін 2024 жылы еліміздің 11 қаласында ашылып, балалардың спортпен тегін айналысуына мүмкіндік туды. Қор біздің бапкерлерді арнайы курстарда оқытуға жағдай жасады.

Мөлдір Кенжебай,
Шымкент