Жаңартылған Конституция — әділетті қоғамға жол

Жаңартылған Қазақстан Республикасының Конституциясы елдегі саяси-құқықтық жүйені жаңғыртуға бағытталған стратегиялық маңызы бар құжат болып табылады. Конституциялық реформалар мемлекет дамуының жаңа сапалық кезеңіне өтуіне негіз қалады.
Біріншіден, Конституция билік тармақтары арасындағы тепе-теңдік пен өзара тежемелік жүйесін күшейтті. Президент өкілеттіктерінің бір бөлігінің Парламент пен жергілікті атқарушы органдарға берілуі мемлекеттік басқарудың ашықтығы мен есептілігін арттырып, демократиялық институттардың тиімді жұмыс істеуіне жағдай жасады.
Екіншіден, Конституциялық Соттың қайта құрылуы азаматтардың конституциялық құқықтары мен бостандықтарын қорғаудың жаңа тетігін қалыптастырды. Бұл өзгеріс заң үстемдігін қамтамасыз етіп, әрбір азаматтың құқықтық мемлекет қағидаттарына сай қорғалуына мүмкіндік береді.
Үшіншіден, Конституцияда адам құқықтары, әлеуметтік әділеттілік және тең мүмкіндіктер қағидаттарының нақты бекітілуі мемлекет пен қоғам арасындағы сенімді нығайтты. «Халық үніне құлақ асатын мемлекет» тұжырымдамасы осы реформалар арқылы нақты мазмұнға ие болды.
Қорытындылай келе, жаңартылған Конституция – Жаңа Қазақстанды құру жолындағы берік құқықтық іргетас. Ол елдің тұрақты дамуын қамтамасыз етіп, қоғамдағы әділеттілік пен жауапкершілік мәдениетін қалыптастыруға қызмет етеді.

Меруерт Құрманбаева,

биология ғылымдарының докторы, профессор