Жұртты алдаған нотариус жазадан құтылмады

Алматыда жұрттан ондаған мың доллар алып, тақырға отырғызған нотариус қызметкерлеріне қатысты сот үкімі шықты. Алаяқтық жасаған Жанар Өтешева алты жарым жылға кесілгенімен, амнистияға ілініп, жазасы сот залында-ақ жеңілдетілді.

ktk.kz хабарлағандай, Өтешеваның алған мерзімі 3 жылға жетпейді. Алайда, оның сыбайласы болған күйеуі енді 5 жарым жылын темір торда өткізуі тиіс. Сондай-ақ, алаяқтық әрекетіне қатысы бар Өтешеваның әпкесі Ләззат Сабырәлиева 5 жарым жыл шартты жаза арқалады. Оның үстіне, жапа шегушілердің пайдасына Өтешевадан 180 миллион теңге көлемінде қаржылай-материалдық өтемақы алынатын болды. Айта кетейік, Жанар Өтешева осыдан 4 жыл бұрын біраз адамды алдап, құнды дүниелерін, ақшаларын, тіпті көліктерін алып, артынша жоқ болған. Ол адамды сендірудің шебері екен. Тақырға отырғандарын кеш ұққан жұрт полиция арқылы оны екі жылдан кейін әзер тапты. Дегенмен, олар соттың берген жазасын азсынып отыр.

Баян Жұмабекова, зардап шегуші:

-Маған 13 миллион теңгедей бережақ еді. Сот 4 миллионын қайтару керек дейді. Яғни ақшам толық берілмейін деп тұр. Алған жаза мерзімі де аз. Мұндай адам қоғамда еркін жүрмеуі керек. Біз қайта шағымданамыз.