Ұлттық ұлан: Әскери қызметшінің отбасына қысым көрсетілгенін дәлелдейтін фактілер расталған жоқ

Ұлттық ұлан әскери қызметшісі Данияр Амалбековтың өліміне, оның отбасының әскери құрылымдар тарапынан қысым көрсетілгені жөніндегі мәлімдемесіне қатысты ресми түсінік берді, деп хабарлайды jasqazaq.kz.
Әлеуметтік желіде сарбаздың әкесі Серік Амалбеков өзіне қысым көрсетілгенін, әскери құрылым өкілдері баласының әскерге дейін ауырғаны жөнінде бейнеүндеу жазуға мәжбүрлегенін айтқан еді. Сондай-ақ отбасы лейкоз диагнозы туралы нұсқаны жоққа шығарып, ресми медициналық растау болмағанын жария етті.
Ұлттық ұланның ресми хабарламасында Данияр Амалбеков әскери бөлімге 2025 жылғы 9 желтоқсанда келген, медициналық көмекке алғаш рет 17 желтоқсанда жүгінгені, сол кезден бастап оған қажетті медициналық көмек көрсетілгені айтылады.
Ұлттық ұлан дерегінше, 29 желтоқсанда сарбаздың денсаулығының нашарлауына байланысты оны ауруханаға жатқызу туралы шешім қабылданып, Шымкент қаласындағы медициналық мекемелердің біріне жеткізілген. 2026 жылғы 6 қаңтарда, қабылданған барлық шаралар мен көрсетілген медициналық көмекке қарамастан, жүрек тоқтауы тіркелді. Алдын ала диагноз – жедел лейкоз.
Ұлттық ұлан бұл дерек бойынша әскери-тергеу департаменті тарапынан қылмыстық іс қозғалғанын растады. Қазір барлық қажетті процессуалдық әрекеттер жүргізіліп жатыр, ал тергеу барысы әскери прокуратураның бақылауында.
Ресми түсініктемеде марқұмның отбасына қысым көрсетілді деген мәлімдемелерге де түсінік берілді: «Қаза тапқан әскери қызметшінің отбасына қысым көрсетілгенін дәлелдейтін қандай да бір фактілер расталған жоқ. Дегенмен бұл уәждер тергеу аясында қосымша түрде міндетті түрде тексеріледі».
Сонымен қатар ведомство тарапынан марқұмның отбасына жан-жақты қолдау көрсетіліп жатқаны айтылды. Жерлеу рәсіміне қажетті көмек көрсетіліп, әскери бөлім басшылығы ата-анамен тұрақты байланыста болғаны, әрмен қарай да барлық қажетті қолдау мен жәрдем көрсетуге дайын екені атап өтілді.
Ресми хабарламада: «Бұл отбасы үшін аса ауыр қайғы екенін түсінеміз және жағдайға барынша жауапкершілікпен әрі мұқият қараймыз. Осыған байланысты азаматтарды тек ресми ақпаратқа ғана сенуге және тексерілмеген мәліметтерді таратпауға шақырамыз», — делінген.

JQ-Aqparat

Сурет: zakon.kz