Ұлттық құрылтай: Президент ұлттық мүддені жамылып, саяси дивиденд алғысы келетіндерді сынады

Президент Қасым-Жомарт Тоқаев Қызылордада өтіп жатқан V Ұлттық  құрылтайда сөйлеген сөзінде отаншылдық, патриотизм туралы айтып өтті, деп хабарлайды jasqazaq.kz.
Мемлекет басшысы: «Отаншылдық дегеніміз – әрине, Отанға деген сүйіспеншілік деген сөз. Алайда Отан алдындағы жауапкершілігіңді сезініп, перзенттік парызыңды өтеуге талпынбасаң, «отаншылмын, патриотпын» деген сөзіңнің құны көк тиын болмақ.
Қазір қоғамда «Қазақстанның мемлекеттік Туын қайда және қашан қолданған жөн?» деген маңызды мәселе талқыланып жатыр. Бұл мәселе арнайы нормалармен және ережелермен реттеледі. Мемлекеттік рәміздерді пайдалануға жеңіл-желпі, салғырт қарауға болмайды. Заң талабы  әрдайым орындалуға тиіс.
Дегенмен, ең алдымен, заңның түпкі мәнін терең түсіну керек. Мемлекеттік рәміздерді қадірлеп, оларды жөнімен пайдаланатын отаншыл азаматтарды барынша қолдау қажет.
Мен үйлерде, көліктерде, көшелерде, сондай-ақ еліміздегі, әсіресе, шетелдегі спорттық және іс-шараларда көк Туымыз желбіреп тұрғанда қуанып қаламын. Сол арқылы еліміздің азаматтары бірлігі бекем ұлт екенімізді көрсетеді. Олардың әрекеттерінен туған елін мақтан тұтатыны байқалып тұрады», — деп, патриот болу азаматтық жауапкершілік екенін еске салды.
Сондай-ақ ұлттық мүддені сылтауратып, Отанға деген сүйіспеншілік сияқты қастерлі сезімнен саяси дивиденд алғысы келетін адамдар керек емес екені кесіп айтты.
JQ-Aqparat

Сурет: aqorda_resmi