Қызылорда қаласында өтіп жатқан Ұлттық құрылтайдың V отырысында Президент Қасым-Жомарт Тоқаев сөз сөйлеп, бірқатар маңызды мәселелерге тоқталды, деп хабарлайды, jasqazaq.kz.
Мемлекет басшысы Ұлттық құрылтай жиыны осымен бесінші рет шақырылып отырғанына тоқталып, тұңғыш рет Ұлытауда, одан кейінгі жылдары Түркістан, Атырау мен Көкшетауда, биыл Қызылордада өтіп жатқанын атап өтті: «Бұл – халқымыз үшін орны ерекше аймақ. «Сыр – Алаштың анасы» деген аталы сөз бар.
Осы атыраптағы Шірік-Рабат, Жанкент, Сығанақ, Алтынасар, Баршын-кент қалаларының орны көне заманның өзінде қазақ жерінде дамыған қала өркениеті болғанын аңғартады. Қызылорданы сол әйгілі қалалардың заңды жалғасы дей аламыз.
Бұл шаһардың тарихи мән-маңызы айрықша. Оның осыдан бір ғасыр бұрын Қазақстан астанасы болғаны баршаға мәлім. Бұл жерде еліміздің болашағына қатысты аса маңызды шешімдер қабылданды».
Мемлекет басшысының айтуынша, соңғы жылдары Қызылорда облысы заман талабына сай өсіп-өркендеп жатыр. Өткен жылы аймақтың жалпы ішкі өнімі 6,5 пайызға өсті. Үш жылда облысқа 2 триллион теңгеге жуық инвестиция тартылды. Сондай-ақ былтыр 27 инвестициялық жоба жүзеге асырылды.
Соның ішінде жаңа жылу электр орталығы іске қосылды. Стратегиялық маңызы бар бұл нысан толығымен инвестордың қаржысына салынды. Жылу орталығы аймақтың энергетикалық қауіпсіздігін нығайта түседі.
Президент: «Облыс тұрғындары сапалы ауыз сумен қамтамасыз етілді. Халықтың 80 пайызы көгілдір отынды пайдаланады. Елді-мекендерге газ құбырын тарту жұмысы алдағы уақытта жалғаса береді. Аймақтағы автокөлік жолының сапасы жалпы жақсы жағдайда деуге болады. Облыстың әуе және темір жол жүйесі де жаңғыртылып жатыр. Қорқыт Ата әуежайының жаңа терминалы ашылды.
Қызылорда қаласындағы тарихи ғимараттың бірі – темір жол вокзалы күрделі жөндеуден өтті. Бұған қоса, аймақтағы 10 темір жол бекетін жаңғырту жұмысы басталды. Мұның бәрі облыстың логистикалық әлеуетін арттыра түседі», — деп атап өтті.
Мемлекет басшысы Қызылорда облысында, әсіресе, әлеуметтік салада жақсы жаңалық көп екеніне тоқталды.
Үш жылда осы аймақта 34 білім беру, 45 мәдениет және спорт нысаны салынды. Бұған қоса, 40 медицина нысаны ашылды.
Президент: «Менің тапсырмаммен Қызылордада 300 орынға арналған көп бейінді аурухананың құрылысы басталды. Көп ұзамай 500 орындық емхана және 200 орындық перзентхана салынады.
Бір сөзбен айтқанда, Қызылорда облысы барлық салада қарқынды дамуда. Облыстың жағдайы жалпы жақсы деп күмәнсіз айтуға болады», — дей келе бұл – әкім Нұрлыбек Нәлібаевтың белсенді, табанды жұмысының нәтижесі екенін айтты.
JQ-Aqparat
Сурет: aqorda_resmi
WhatsApp: +7 705 717 9113
