Үлескерлерді 606,5 млн теңгеге алдаған

Қаржылық мониторинг агенттігінің Шығыс Қазақстан облысы бойынша департаменті ЖШС басшылығын үлескерлерден заңсыз ақша жинады деген күдікпен қылмыстық істі тергеп жатыр.

Ведомство өкілдерінің мәліметінше, қылмыстық істі тергеу барысында ЖШС-нің лауазымды қызметкерлері 2021-2023 жылдар аралығында үлескерлердің ақшалай қаражатын тартуға рұқсаты болмай, пәтерлерді ерте кезеңде брондау арқылы азаматтарды үлестік құрылысқа белсенді тартқаны анықталған.

«Халықтың сенімін асыра пайдаланып, оларды алдау арқылы 606,5 млн теңге сомасында ақша қаражатын иемденді», – дейді ҚР ҚМА Ресми өкілі Әлібек Әбділов.
Оның сөзінше, қазіргі уақытта тараптардың қосымша келісімдер жасасу арқылы пәтерлерді алдын ала брондау шарттары тоқтатылды, құрылыс жұмыстары жүзеге асырылмайды.Сот шешімімен ЖШС-нің құрылыс-монтаж жұмыстарын орындауға лицензияның қолданылуы тоқтатылды.

ЖШС жетекшісіне соттың санкциясымен қамауда ұстау түріндегі бұлтартпау шарасы таңдалды.

JQ-Aqparat