Түркістан облысында «Қауіпсіз қоғам» жобасы жүзеге асырылуда. Жобада құқықтық тәртіпті қамтамасыз ету және жол қауіпсіздігін қадағалау мақсатында заманауи технологиялардың, оның ішінде Түркістан облысы ПД жедел басқару орталығымен интеграцияланған бейнебақылау камераларының мүмкіндіктері кеңінен қолданылады.
Түркістан облысы Полиция департаменті бастығының орынбасары, полиция полковнигі Асылжан Қалдарбеков jasqazaq.kz тілшісіне «Қорғау — қауіпті жүргізуші» жобасы қалай жүзеге асып жатқанын айтып берді. Оның айтуынша, Түркістан облысы ПД жедел басқару орталығының қызметкерлері мен патрульдік полицейлер «Қорғау — қауіпті жүргізуші» бағдарламасы аясында жол ережесін өрескел бұзған жүргізушілерді анықтаған.
Асылжан Қалдарбеков: «Жыл басынан бастап қарызы бар екеніне қарамастан, жол қозғалысы ережелерін бұзып жүрген 851 автокөлік анықталды. Оның ішінде әкімшілік айыппұл салынған 829 автокөлік жүргізушісі және жеке сот орындаушыларынан түскен қаулылар негізінде анықталған 22 борышкер анықталды. Борышкер жүргізушілердің жалпы берешегі 136,5 миллион теңгеден астам. Бұған дейін автокөлік иелеріне ескерту жасалды. Әкімшілік айыппұл мен қарызын төлемеген автокөлік жүргізушілері өзге көлік жүргізушілеріне қауіп төндіріп, облыс аумағындағы жол ережелерін бұзуды жалғастырған. Борышкерлердің көліктері айыптұраққа қойылды», — деді.
Түркістан облысында полицейлер «Қорғау — қауіпті жүргізуші» жобасы бойынша «Қорғау» бағдарламасының көмегімен әкімшілік айыппұлдар бойынша берешегі бар және келіп түскен сот қаулыларының негізінде жүргізушілерді анықтау жұмыстарын алдағы уақытта да жалғастырады.
Жедел басқару орталығының қызметкерлері көше камераларынан деректерді талдайтын және жақын маңдағы полиция нарядтарының планшетіне хабарламалар жіберетін бағдарламаны пайдаланатын болады.
Мақпал Махаметқызы,
Түркістан облысы
Суреттер: Түркістан ПД баспасөз қызметі
WhatsApp: +7 705 717 9113
