Түркістан облысында тұрғындардың әлеуметтік жағдайын жақсарту іс жүзінде жүзеге асырылып келеді. Нақты мысал ретінде Түлкібас ауданында 48 отбасыға пәтер кілттері табысталғанын айтуға болады.
Түркістан облысы әкімінің баспасөз қызметінің мәліметінше, салтанатты шараға аудан әкімі Асқар Естібаев пен аудандық мәслихаттың төрағасы Серғали Сәрсенбаев қатысып, қоныс той иелерінің қуаныштарымен бөлісті.
Аудан әкімі асқар Естібаев. «Мемлекет басшысы Қасым-Жомарт Тоқаевтың халықты баспанамен, жұмыспен қамтуға арналған бағдарламаларының нәтижесінде қаншама отбасы баспаналы болып, жұмысқа орналасуда. Бүгінгі таңда Түлкібас ауданында тұрғын үй кезегінде 3250-ден астам азамат болса, соның ішінде бүгін 48 азамат жаңа баспанаға қол жеткізді. Оның ішінде ата-ананың қарауынсыз қалған балалар, көп балалы отбасылар, жалғызбасты аналар, мүмкіндігі шектеулі балаларды тәрбиелеп отырған жанұялар мен жас отбасылар бар. Бұл бағыттағы жұмыстар осымен тоқтап қалмай, алдағы уақытта жалғасын табады», — деп атап өтті.
Баспаналы болғандардың қатарында көпбалалы жеті баланы тәрбиелеп, өсіріп отырған Сұлушаш Нұрымбетованың қуанышы қойнына сыймайды.
«Үй кезегіне 2018 жылы көпбалалы ана ретінде тұрған болатынмын. Бүгін, міне, мемлекетіміздің қолдауымен және бала-шағамның несібесіне орай үш бөлмелі пәтерге қол жеткізіп отырмын. Барша бүгінгі қоныс тойын тойлағалы отырған көршілерімді жаңа үйлерімен құттықтаймын. Үйге қол жеткізе алмай жүрген жандарға жұғысты болсын дегім келеді», – деді баспанаға қол жеткізген көпбалалы ана.
Айта кетейік, биылғы жылдың наурыз айында аудан орталығына қарасты «Нұршуақ» шағынауданында 56 жаңа пәтер кілттері үй кезегінде тұрған азаматтарға табысталған болатын. Осылайша, биыл 104 түлкібастық жаңа баспанаға қол жеткізіп отыр.
JQ-Aqparat
Түркістан облысы әкімінің баспасөз қызметі
WhatsApp: +7 705 717 9113
