Технология қарыштап дамыған бүгінгі заманда интернет алаяқтар түрлі әдіс-тәсілдерді ойлап тауып, талай адамды сан соқтырып жатыр. Бұқаралық ақпарат құралдарында алаяқтың торына түсіп қалмау жөнінде талай айтылса да, алаяққа ақшасын өз қолымен бере салатындардың қатары азаймай тұр. Сондықтан интернет алаяқтықтың алдын алудың маңызы зор. Бұл бағытта Түркістан облысы полиция департаментінің қызметкерлері профилактикалық жұмыстарды жүйелі түрде жүргізеді. Ақпарат құралдары мен әлеуметтік желілер арқылы осындай қылмыстардың алдын алу бойынша түрлі жазбалар мен роликтер тарату жолға қойылған. Қоғамдық орындарда, көше-көшеде арнайы бильбордтар ілінеді. Оған қоса, учаскелік полиция инспекторлары да халыққа жадынамалар таратуда.
Бүгінгі заманның алаяқтары ақпараттық жүйені пайдаланып, алдап-арбау, сеніміне кіру арқылы біреудің мүлкін жымқыруға тырысады. Олар компьютер, смартфон, планшет секілді заманауи құралдардың көмегімен ғаламтор арқылы адамдарды алдап-арбайды, ақша бопсалайды, алдап несие алдырады.
Осы орайда Түркістан өңірінің полиция қызметкерлері интернет алаяқтардан абай болу керектігін ескертеді. Тұрғындарға таратқан жадынамаларда өтірік «банк қызметкері» деп телефон соғатын алаяқтардың әдістері түсіндіріледі, түрлі тауарлар мен автокөлікті сату-сатып алу қосымшаларында күмән келтіретіндей қызмет ұсынылса, ол мағлұматтың қаншалықты заңды екендігіне көз жеткізуге кеңес береді.
Интернет алаяқтықтың алдын алу мақсатында Жетісай аудандық полиция бөлімі қызметкерлері Жетісай қаласының аумағында тұрғындар арасында түсіндірме жұмыстарын жүргізілді. Қоғамдық орындарда, көшелерде, орталық саябақтарда, банктердің жанында және адамдар көп жиналатын орындарда алаяқтардың құрбаны болмас үшін адам өзін қалай ұстау керектігі жөнінде арнайы дайындалған билбордтар ілініп, жадынамалар таратылды.
JQ-Aqparat
Сурет: Түркістан облыстық полиция департаментінің баспасөз қызметі
WhatsApp: +7 705 717 9113
