Түркістан облысында оныншы полиция сыныбы ашылды

Түркістан облысында полиция департаментінің бастамасымен жастарды өз Отанын сүюге, ел тыныштығын күзету мен ұлттық әскер сапында адал қызмет атқаруға баулитын полиция сыныптары ашылуда, деп хабарлайды Түркістан облысы полиция департаментінің баспасөз қызметі.

Осы ретте Түркістан облысы Қазығұрт ауданы Тұрбат ауылындағы Ш.Қалдаяқов атындағы жалпы білім беретін орта мектебінде облыс бойынша оныншы «Жас сақшы» полиция сыныбы ашылды. Сыныпқа Қазығұрт аудандық полиция бөлімінде 10 жыл қызмет атқарып, ерлікпен қаза тапқан Бауыржан Садықбековтың есімі берілді.

Салтанатты шараға аудан әкімі Азизхан Исмаилов, полиция бөлімінің бастығы Алмас Серікбаев, ардагерлер кеңесінің төрағасы Сағидулла Жұматаев, мәслихат төрағасы Тайбек Қалымбетов пен зиялы қауым өкілдері және марқұм Бауыржан Садықбековтың ата-анасы, жұбайы мен ұл-қыздары қатысты.

Жиында сөз алған А.Серікбаев, полиция мамандығының қоғамда алатын рөлі жайлы айта келіп, марқұм болған Бауыржан Садықбеков жайлы жылы естеліктермен бөлісті.

Айта кетсек, оқушыларға полицейдің нысанды киім үлгісі тігіліп, берілді. Ал сынып бөлмесі ерлікпен қаза тапқан полицейге арналған арнайы бұрышпен жабдықталды. Шара соңында 16 оқушы ант беріп, «Жас сақшы» қатарына қосылды.
Сонымен қатар полиция сыныбының оқушылары республикалық жарыста жеңіс тұғырынан көрінді
ҚР ІІМ-нің ұйымдастыруымен Алматы қаласында «Спорт — есірткіге қарсы» ұранымен республикалық жарыс өтті. Іс-шараға еліміздегі орта білім беру мектептерінің 12-14 жас аралығындағы «Жас сақшы» сыныптарының оқушылары қатысып, ҚР ІІМ кубогы үшін футбол ойынында бақ сынады.

Аталған тартысты дода 21 команданының арасында өтті. Жасыл алаңда жас сақшылар өздерінің ептіліктерін, жылдамдықтарын, спортқа деген қызығушылықтарын көрсетті. Салауатты өмір салтын ұстанатындықтарын дәлелдеді.
Нәтижесінде «Жас сақшы» Түркістан облысы Полиция департаментінің «Тұран» командасы бабы мен бағы келісіп, топ жарып жүлделі ІІ-орынды иеленді. Сонымен қатар «Үздік қорғаушы» номинациясы да «Тұран» командасының қанжығасына байланды.
Осылайша Түркістан облысының атынан қатысып, жеңіске жеткен жасөспірімдер, өздерінің барша қатарластарын спортпен айналысып, нашақорлық және басқа да зиянды әдеттерге жоламауға шақырды.

JQ-Aqparat
Сурет: Түркістан облысы ПД баспасөз қызметі