Түркістан: Нашақорлыққа және есірткі бизнесіне қарсы күрес күшейтілді

Құқықтық тәртіпті сақтап, тұрғындардың қауіпсіздігін қамтамасыз етуде есірткі бизнесі мен нашақорлыққа қарсы аяусыз күрес жүргізілуі тиіс. Түркістан облысының құқық қорғаушылары бұл бағыттағы күресін күшейте түсті. Осы орайда нашақорлыққа және есірткі бизнесіне қарсы іс-қимылға бағытталған қызметін үйлестіру жөніндегі өңірлік ведомствоаралық штаб мәжілісі өтті. Штаб төрағасы, облыс әкімінің орынбасары Бейсенбай Тәжібаев қоғамның дертіне айналған нашақорлыққа және есірткі бизнесіне қарсы күресті жандандыру қажет екенін айтып, жауапты мекеме басшыларына жұмысты ширатуды тапсырды.

«Әр аудан мен қалаға жүйелі түрде сараптама жасап, нашақорлық пен есірткі саудасы жиі тіркелген аймақтардың мәселесін талқылау керек. Жас ұрпақты жарқын болашағыныан айырып жатқан бұл жаман әдеттің алдын алуда жаңа тәсілдерді енгізген жөн. Тиісті ұсыныстар беріңіздер. Профилактикалық, алдын алу жұмыстарын сапалы жүргізу, күшейту аса маңызды. Құқық қорғау органдары, білім, денсаулық сақтау саласына жауапты басқармалар, Жастар ресурстық орталықтары бірлесе жұмыс атқарса ғана іс нәтижелі болады, – деді Бейсенбай Тәжібаев.

Есірткі қылмысына қарсы іс-қимыл басқармасы бастығының міндетін атқарушы, полиция полковнигі Аман Бұрханов: «2024 жылдың 3 айында есірткінің заңсыз айналымына қатысты 212 дерек анықталған. Оның ішінде есірткі сату бойынша 12, есірткіні контрабандалық жолмен тасымалдау арнасының 64 дерегі тіркелген. Заңсыз айналымнан 116,6 келі есірткі заттары тәркіленді. Биылғы 3 айда синтетикалық есірткіні жарнамалаған 60 ақпараттық сайт бұғатталды», — деді.

Есірткі қылмысына қарсы іс-қимыл басқармасы және барлық аудандық полиция бөліністеріндегі ювеналдық полиция тобының инспекторларымен бірге күнделікті облыс жастары, мектеп оқушылары және студенттер арасында есірткі қылмыстарының алдын алу мен нашақорлықты болдырмау бойынша профилактикалық іс-шаралар жүргізіліп келеді. Биыл 3 айда 33 580 мектеп оқушысы мен студенттер және жастар арасында 143 профилактикалық іс-шарасы мен құқықтық түсіндіру жұмыстары жүргізілді.

JQ-Aqparat