Түрік футболының Ардасы

Бүгін «Қайрат» пен «Реал» жасыл алаңда кездеседі. Әлем футболында жарқыраған жұлдыздардың Алматыға келуінің өзі жеңіске бергісіз жетістік екені белгілі.

Жанкүйердің ауызында Мбаппе, Винисус, Беллингем. Аты аңызға айналған корольдік клуб сапында Арда Гүлер де бар. Жасы жиырмаға енді толған уыздай бозбала. Соған қарамастан, теңбіл допты ұршықша иіретін шеберлігімен, қақпаның саңылауын дәл табатын машығымен талайды тамсантып, таң қалдырған сұрмерген. Оның талантын мойындамаса, дәл осы «Реалға» шақырмас еді. Міне, екі жылдан бері осы команданың жейдесін киіп, әлемдік аяқдоп өнеріндегі ең мәртебелі жүлделерді иемденіп жүр.

Арда футболшы, мұнымен қатар, Түркия ұлттық құрамасының беткеұстар шабуылшысы. Дүбірлі додада өз елінің намысын абыроймен қорғайды. Шешуші сәтте соққан голымен күллі Анадолы атырабын естен кетпес қуанышқа бөлеген саңлақ. Ол түрік футболының даңқын асырып қана қойған жоқ, доп тебуге құмартқан мыңдаған өренге үлгі-өнеге болды. Олар 8 жасында Анкарадағы «Генчлербирлиги» командасына келіп, 6 жылдан кейін атақты «Фенербахче» клубының балалар тобына қосылған Арда ағасына қарап бой түзеп жүр.

Спорт тек шеберлік шыңына шығарып қоймайды. Қомақты табыс табуға да мүмкіндік береді. Былтыр осы саланың мамандары Арда Гүлердің бір жылда алатын жалақысы 5 млн еуродан асқанын хабарлады. Қарапайым отбасы үшін бұл қомақты қолдау. Ол баласының футболшы болуын армандап, бар жағдайды жасаған ата-анасына Ыстамбулдың қақ ортасынан зәулім үй сатып әперді.

Бүгін Арда өзінің түркі бауыры Дастанмен (Сәтбаев) жасыл алаңда күш сынасады. Екеуінің спорттағы тағдыры ұқсас. Дастан да балалар футболы мектебінің түлегі. Бұйырса, 18-ге толғанда Англияның адуынды «Челси» клубы сапында өнер көрсетеді. Екеуі де жастай баулыса, «алынбайтын асу жоқ» дейтін тәмсілді ақиқатқа айналдырған жарық жұлдыздар.

Срайыл Смайыл

Сурет:  fondoruso.ru